Col 2 | WSK | STEP | Ani nina ikialko ninga manorsam, ani nina se, Kris kariimet Laodicea anisan se, Kris saki amake me arikasan tala, mu nina yawarakala bagaralko angamang biyala aniso. Se ani nina nego ko tom suen biya Kaem aru ngatangorsam,

Colossians 2

Ikia nunguning Kristus kote aniso

1 Ani nina ikialko ninga manorsam, ani nina se, Kris kariimet Laodicea anisan se, Kris saki amake me arikasan tala, mu nina yawarakala bagaralko angamang biyala aniso. Se ani nina nego ko tom suen biya Kaem aru ngatangorsam, 2 nu ninga sanguk se nina nengemang sokel ago baga se, ninimi ko kueral ale nengemang suwanta bagaralko. Mu te nina Kaem ko ikia nunguning mu arigal ale ko ikialko, ale te nengemang aora biya bagaralko. Nina Kaem ko ikia yumura te anikaso mu ko ikialko, mu iwita: nu Kristus kota suwanta te ninga sangukko. 3 Mu awuk, anapeya ikia ningo ningo mu nukote ninguru aniso. Nu kota ikia nunguning ko duap. ^{▼▼Col 2:3 Ikia nunguning: 1 Cor 1:30.}

4 Ani uwutata ninga manorsam mu kariimet bo den kawel welang te me ninga kulokko. 5 Ani nina nengerak me bagasam. Bare aninga ikia te mu nengerak bagasam iwita. Se nina nengemang suwanta bagasan ale Kristus ko ninguru nengemang ningi nunguning aram mu ko ani amilmilasam. 6 Nina Jesus Kristus ninga Kari Biya ko beteman. Buta se ilak wete bagaralko. 7 Nina nu te la yager waral ale sokel ago bagaralko. Ale noko den ninga manorman mu te nengemang ningi nunguning sail tual ale, tom suen biya Kaem amilmil tui se bagaralko.

Ali imi ko munan mu Kris alo me nunga sangukko

8 Sinar talko! Ali imi ko ikia kawel duap duap, Kristus ko ikia karogo me terong, wore ninga kasurmon se karo tual bore ko ninguru sinar talko! 9 Mu awuk, Kaem ko munan, ko marak sokel suen la mu Kristus kumik ago terong ma saparam. 10 Se nu te nina marak sokel karogo terong maman. ^{▼▼Col 2:9-10 Jesus marak nunguning nangarso: John 1:14, 16-18.} Nu engel bibiya nunga sokel aguwaya bare nu mu am nunga kualala biya.

11 Juda alo nungumik guang batagorsan mu te, nuna nunumi balsan Kaem ko kari masan. Bare mu nungumik guang la, se am kausa bo. Bare nina mu Kristus ilak kapetaman, se nu nenenga ikia memek nengemang te anikaso mu menawuram, ale Kaem ko kariimet nunguning ko ninga awuram. ^{▼▼Col 2:11-14 Kaem ko kariimet nunguning: Rom 2:29. Anuwa tata ko munan: Rom 6:4; 7:7-11. Law Den: Rom 7; 1 Cor 15:55-56.} 12 Mu iwita: nina anuwa taman mu ko ikia, nina kilek memek te bagakasan mu nibiring tuman ale Kristus ilak kapetaman, ilak kueman se ilak ninga mutim tuguman. Ale ilak barasaman, mu awuk, nina Kaem ko sokel nu te Kristus patowaram mu ko nengemang ningi nunguning aram.

13 Ulengkala nina Kaem ko marak sokel bo nengete mena. Mu awuk, nina memek ago, se betela ikia memek nengemang te am anikaso. Bare Kaem nina Kristus ilak ninga maraguwuram se nina aitak noko marak sokel te bagasan. Nu Kristus tam kangono te kueram mu te ko law den, ana te den ningi kapakasan ale te kuakasan wore ko sokel menawuram ale anananga memek suen la siwu saparam. 15 Nu tam kangono mu te, Satan se ko engel bibiya nunga kiaram, nunga nosokel menawuram, ale kariimet nomotam te mel yam ko iwita nunga beteram.

Kristus mu munan girakala tuaturum iwita bitakasan mu ko nunguning bita saparam

16 Buta se, nina sinar talko! Juda nunga tom bibiya duap duap aniso, te laili bita gilingisan. Tom sige iru aratoso, se Sabbath tom, se tom saki saki karogo la ko bita gilingisan. Bare nunga kari saki ninga manarmon, nina karogo beteralko balmon mu, nina nuguring me ikialko. Se ninga na yu nasan mu ko betela ninga manarmon mu me ikialko. ^{▼▼Col 2:16-23 Sinar ta ko den: Rom 14:3,5,16-17; Gal 4:9-11. Tuaturum ko den: Heb 8:5; 10:1. Ali imi ko ikia kawel: Mat 15:9; 1 Tim 4:1-7.} 17 Mu awuk, nuna bitakasan mu mel nunguning mena, mu tuaturum bitakasan, se tom suen biya anirukko mena. Bare Kristus mu mel tuaturum nuna bitakasan wore ko nunguning nu am bita saparam, se tom suen biya ko.

18 Se nina kari awiriya ninga manarso nu numi ira kutuwuso ale engel nunup patawoso maso, ale nina betela beteralko ninga manarso, bare kari mu kuring me ikialko! Nu ipingiso ale mel arigiso maso, ale te numi patawoso, bare noko ikia mu me terong, kawel, ali ewere ko la. 19 Mu nu anananga Biya Kristus ko bowa ningi me bagoso. Nangimik guang ko gira mu nasupuling bagoso mu turantala, Kristus mu ana Kris alo nanga supuling bagoso. Nu la ko munan, ko sokel te nanga bolala awuso ale nanga bitaruwoso se te sokel ago lagasan, Kaem ko gomang ana te laganakko aniso mu te la lagasan.

20 Nina Kristus ilak kueman, ale ali imi ko ikia, ko munan nibiring tuman. Se nina awuk se ali imi ko kariimet munan balsan wore karo tusan? 21 Nuna balsan, “Mel mu me ilu to, na mu me no, me kau to!” masan. 22 Bare na mel umutang mu am ali imi ko mel, mu menarukko. Ali imi ko kariimet munan mu karogo arataman ale ninga kasursan. Ale balsan, “Ninimi ira kutuwural ale engel nunup patowaralko,” masan. “Ninimi ira kutuwural ale ningimik guang bita maguwura ko munan te ninga ikia memek menawuralko,” masan. Se nunga ikia balsan ko ariga mu munan ikia ningo iwita. Bare mu ikia kawel. Mu anananga sanguk se nanga ikia memek menawunakko me terong.

23